२०८३, श्रावण १३ गते
.png){kind=small}
लुम्बिनी चिन्तन
भैरहवा । जिल्ला प्रहरी कार्यालय रूपन्देहीले मोटरसाइकल चोरी गर्ने समूहलाई पक्राउ गरेको छ ।
मोटरसाइकल चोरी भएको भनि कार्यालयमा निवेदन आएपछि कार्यालयबाट खटिएको टोलीले खोजतलास गर्दा नवलपरासीबाट मोटरसाइकल सहित चोरी गर्ने समूह पक्राउ परेका हुन ।
शनिबार २ बजे ओमसतिया–४, बालापुर प्रदिप गुप्ताको मोटरसाइकल चोरी भएपछि खोजतलास गर्दै जादा प्रहरी टोलीले नवलपरासी प्रतापुर गाउँपालिका वडा नं.१ जमुनियाका दिपक थारुको घरमा लुकाई छिपाई राखेको अबस्थामा फेला पारेको थियो । गुप्ताको लु ६३ प ४२२० सहित अन्य ३ वटा लु ४४ प ८१९५, लु ४२ प ४६ रलु ४२ प ५६०७ नं.को मोटरसाईकलहरु समेत एकै ठाँउमा राखेको अवस्थामा प्रहरीले बरामद गरेको छ ।
थारुको घरमा मोटरसाईकल बरामदसँगै सोधपुछ गर्दा उक्त मोटरसाइकल खिरि नारायण थारु र खेम नारायण थारुले ल्याई राखेका बयान दिएपछि उनीहरुलाई समेत सम्पर्कमा ल्याई पक्राउ गरिएको जिल्ला प्रहरी कार्यालय रुपन्देहीका प्रवक्ता प्रहरी नायब उपरिक्षक सत्य नारायण थापाले जानकारी दिए ।
पक्राउ पर्नेमा नवलपरासी प्रतापुर गाउँपालिका वडा नं.१ जमुनियाका ३५ वर्षिय दिपक थारु, सोही स्थान वडा नं.२ बस्ने २० वर्षिय खिरि नारायण थारु र सरावल गाउँपालिका वडा नं.२ बस्ने ३० वर्षिय खेम नारायण थारुलाई रुपन्देही जिल्ला अदालतबाट चोरी मुद्धामा ५ दिनको म्याद थप अनुमती लिई अनुसन्धान भैरहेको थापाले जानकारी दिए । उनीहरुको समूहले मोटरासाइकल चोरी गर्दै विक्री गर्ने गरेको प्रारम्भिक अनुसन्धान बाट खुलेको छ ।
