भैरहवा । रुपन्देहीको मर्चवारमा तराई–मधेश समृद्धि कार्यक्रम अन्तर्गतका घर समयमा निर्माण सम्पन्न नहुंदा २४ परिवार अलपत्र परेका छन । कोटहीमाई गाउँपालिकामा विपन्न परिवारका लागि निर्माण हुनुपर्ने उक्त घर निर्माण कम्पनिले समयमा निर्माण सम्पन्न नगर्दा विपन्न परिवार बिचल्लीमा परेका हुन् ।

घर बन्ने आशमा रहेका ती परिवारहरुले जसो तसो त्रिपाल र छानाको घरमा जिवन गुजारिरहेका छन् ।  विपन्न परिवार घर बन्ने आशमा ओत लाग्ने ठाँउ नै भत्काएर घर निर्माणमा लागेपनि निर्माण कम्पनिको लापरवाहीले अहिले उनीहरु अरुको घर र त्रिपालको ओतमा बस्न बाध्य भएका छन् ।

तराई–मधेश समृद्धि कार्यक्रम अन्र्तगत कोटहीमाईमा २४ घर निर्माणको जिम्मा अन्सुमन निर्माण सेवा कम्पनीले लिएको थियो । २०७७ मंसिर ८ गते सम्झौता भई  ६ महिना १८ दिनमा सम्पन्न गर्ने गरी निर्माण कम्पनीले २०७८ जेठ २५ गतेभित्र निर्माण कार्य सम्पन्न गर्ने गरी ६१ लाख ४ हजार लागतमा बनाउने सम्झौता गरे पनि कुनै पनि घर निर्माण सम्पन्न भएको छैनन् ।

“हामीले घर पाउने आशमा आफु बस्दै आएको घर उजाडेर निर्माणका लागि दिएका थियौं तर अझै पनि कहिले घर बन्छ निश्चित छैन ”कोटहीमाई गाउँपालिका–१ परस्पुरका ६० वर्षीय राम उजागिर हरिजनले भने ।

श्रीमती, छोरा बुहारी र नातिनातिनी सहित ६ जना परिवार रहेको हरिजन गाउँपालिकाले टीनको घर बनाउने भनेको पुरानो घर भत्काएर अहिले घर अगाडी त्रिपालले बनाइएको टहरामा बस्दै आएका छन ।

कोटहीमाई–१ कै तिवारीपुर टोलमा दैनिक ज्यालादारीमा काम गरी फुसले बनाइएको छानोमा ७ परिवारसहित बस्दै आएको बलिराम राजभरको पीडा पनि उस्तै छ । ३ महिनादेखि निर्णाधिन जस्तापाता (टीन) को एककोठे घर उस्तै छ ।

यि त केवल उदाहरण मात्र हुन यस्ता दुखेसो २४ घर परिवारकै छ, निर्माण कम्पनीका प्रतिनिधि महिना दिनभयो हेर्न आएको छैनन् निर्माण कार्य परैको कुरा हो । सम्पर्क गर्न खोज्दा  आफूूसंग पैसा छैन, पैसा भएपछि बनाइदिन्छु भनेर जवाफ दिने गरेको अनिल राजभरले भने ।

निर्माण सम्पन्न हुनुपर्ने घर अहिले कुनै जग मात्र पुरेर बसेको छ भने कतै पर्खाल ठडाएर छाडिएको छ । जनप्रतिनिधीहरुलाई यसबारे अवगत हुंदा समेत हामी विपन्न परिवारलाई कसैले साथ दिएको छैन, निर्माण कम्पनीलाई जानकारी गराइदिन्छौ भन्ने आश मात्र दिएको कोटहीमाई–३ कुडसरका त्रिलोकी धोबी सुनाउंछन ।

गाउँपालिका अध्यक्ष चन्द्रभुषण यादवले आफ्नै छोरालाई ठेक्का दिएर गरीब घरपरिवारसंग खेलवाड गरेको कोटहीमाई–१ का स्थानीय चन्दन तिवारीले आरोप लगाउँछन् । यस्तो लापरवाहीबारे गाउँपालिकाको प्राविधिक शाखालाई पटकपटक जानकारी गराए पनि कामप्रति कुनै वास्ता नभएको तिवारीको भनाइ छ । यस्तो समस्याप्रति गाउँपालिका अध्यक्ष चन्द्रभुषण यादवलई जानकारी भए पनि ठेकेदार आफ्नो छोरा भएकोले आफ्नो कर्तव्यबाट पन्छिन खोजेको तिवारीले बताए ।

गाउँपालिका अध्यक्ष यादवकै छोरा विकास यादवले ठेक्का पाएका छन् । निर्माण कार्यको म्याद भन्दा आर्थिक वर्ष पार गरिसक्दा पनि सबै घरहरु अलपत्र रहेको कोटहीमाई गाउँपालिकाका इञ्जिनियर अरबिन्द कुमार यादवले बताए । निर्माण कम्पनीले कोरोना महामारी, निषेधाज्ञा र वर्षाको कारण ढिलाई भएकोे भन्दै म्याद थप गर्न निवेदन दिए पनि म्याद थप भएको छैन । कम्पनीले गरेको कार्यको मुल्यांकन गरी गाउँपालिकाले करीब ५० प्रतिशत मात्र भुक्तानी गरिसकेको इन्जिनियर यादवले बताए ।

कोटहीमाई गाउँपालिकाका प्रमुख प्रशासकीय अधिकृत दिनेश कुमार गौडले गरीब घर परिवारको समस्याबारे आफुलाई पनि जानकारी आएको छ, निर्माण कम्पनीसँग छलफल गरी छिटै अवस्थाबारे बुझ्ने बताए । ‘गाउँपालिका अध्यक्षको छोरोको निर्माण कम्पनी हो, उनले जति काम गरेका छन्, प्राविधिकको मूल्यांकन अनुसार त्यति मात्र भुक्तानी गरिएको छ । सबै घर समयमै सम्पन्न गर्नुपर्ने हो । कम्पनीले के कति कारणले काम गर्न नसकेको हो गाउँपालिका अध्यक्षसंग सल्लाह गरेर आवश्यक परे कानूनी कारवाहीमा जाने प्रमुख प्रशासकीय अधिकृत गौडले भने ।

गाउंपालिका अध्यक्ष यादवसँग भवनबारे बुझ्दा आफुलाई यसबारे केही जानकारी नभएको भनि मोबाइल स्वीच अफ गरे ।

निर्माण कम्पनीका संचालक विकास यादवलाई पटक पटक फोन सम्पर्क गर्दा सम्पर्कमा आउन चाहेनन ।