नेपाली काँग्रेसका केन्द्रीय सदस्य तथा पूर्वगृहमन्त्री बालकृष्ण खाणले अहिलेको यो संविधानको जग धेरै बलियो भएको बताएका छन् । उनले नेपालका स्थापित धारका राजनीतिक दलहरु यो संविधानको पक्षमा रहेको बताए ।

संविधानलाई समाप्त गर्ने मनसायले विभिन्न देशी–विदेशी तागतका साथ प्रयत्न गरिएको उनको भनाइ छ । यो संविधानलाई बचाउने, अगाडि बढाउने कि यसलाई निस्तेज गर्ने अहिलेको सवाल भएको उनले बताए । संविधानलाई सर्वस्वीकार्य बनाउनु नै काँग्रेसको प्रयत्न भएको उनले बताए ।

दुई दलबीच भएको सरकार गठन अघि भएको सातबुँदे सहमतिमध्ये संविधान संशोधन पनि एउटा बुँदा रहेको उनले बताए । ‘संविधान संशोधनको मुद्दा उठ्दाखेरी संशोधनको पक्षमा बहस गर्नेहरु र यसको विपक्षमा रहेकाहरुले अतिरञ्जित रुपमा व्याख्या गरेको सुनिन्छ, ’नेता खाणले भने–‘समावेशी र समानुपातिक सबै हटाइन्छ र जुन कुराहरुले आम नागरिकहरु आशंकित हुन्छन्, त्यस्तै कुराहरु गरेको देखिन्छ ।’

भारतको प्रयागराजमा लागेको महाकुम्भ मेलाले निष्क्रिय रुपैयाँ पैसालाई सक्रिय बनाएको र त्यहाँको अर्थतन्त्रमा उछाल ल्याएको उनले बताए । ‘नेपालको अर्थतन्त्र मजबुत बनाउन सबैभन्दा ठूलो आधारशिला पर्यटन हो, ’उनले भने–‘प्रतिवर्ष २ करोड पर्यटक नेपाल भित्र्याउने सरकारले योजना बनाउनुपर्छ ’। युवालाई नेपालमा रोजगारी दिन सूचना प्रविधिको पनि अधिकतम प्रयोग गर्नुपर्नेमा खाणले जोड दिए ।

त्यस्तै काँग्रेस केन्द्रीय सदस्य तथा पूर्व अर्थ राज्यमन्त्री भरत कुमार शाहले नेपाली जनता र काँग्रेसले नचाहेसम्म मुलुकमा राजा फर्किन नसक्ने दावी गरे । 

कार्यक्रममा काँग्रेस केन्द्रीय सदस्य गंगा शाही, रुपन्देही पूर्व जिल्ला सभापति रामचन्द्र ढकाल, काँग्रेस लुम्बिनी प्रदेश संसदीय दलका प्रमुख सचेतक जमुना ढकाल, जिल्ला समन्वय समिति रुपन्देहीका प्रमुख उमाकान्त चपाईं, संविधान सभा सदस्य तथा सिद्धार्थनगर नगरपालिकाका प्रमुख इश्तियाक अहमद खाँ, संविधान सभा सदस्य जन्नतुन निशा, बुटवल उपमहानगरपालिकाका प्रमुख खेलराज पाण्डेय, कञ्चन गाउँपालिकाका अध्यक्ष नवराज ढकाल, काँग्रेस महासमिति सदस्य विमल प्रसाद ढकाल, रुपन्देही क्षेत्र नम्बर ३ (१) का सभापति सुरेन्द्रजंग थापा, सिद्धार्थनगरका सभापति कोशिष बहादुर खड्का, शुद्धोधन सभापति दामोदर पौडेल, नेपाल क्यान्सर सहयोग समूहका अध्यक्ष दिलिप भट्टराई, नेपाल महिला संघ पाल्पाकी अध्यक्ष मिना पन्थी, नेपाल उद्योग वाणिज्य महासंघ लुम्बिनी प्रदेशका सभापति कृष्ण प्रसाद शर्मा, सिद्धार्थ उद्योग वाणिज्य संघ, रुपन्देहीका अध्यक्ष नेत्र प्रसाद आचार्य, पश्चिम नेपाल बस व्यवसायी प्रा.लि.का अध्यक्ष दधिराम खरेल, काँग्रेस बुटवल–१८ का सभापति होमराज ढकाल, सिद्धार्थनगर–९ का वडाअध्यक्ष दामोदर शर्मा घिमिरेले भनाइ राखेका थिए ।

काँग्रेस क्षेत्र नम्बर ३, रुपन्देहीका क्षेत्रीय सभापति सुशील गुरुङको सभापतित्व, केन्द्रीय सदस्य बालकृष्ण खाणको प्रमुख आतिथ्यता, क्षेत्र नम्बर ३ (२) का सभापति घनश्याम चालिसेको धन्यवाद ज्ञापन तथा क्षेत्रीय सचिव एवं प्रवक्ता लेखनाथ भट्टराईको सञ्चालनमा कार्यक्रम सम्पन्न भएको थियो ।