२०८३, श्रावण १३ गते
.png){kind=small}
लुम्बिनी चिन्तन
भैरहवा, साउन १९ । साउन महिनाको सुरुवातसँगै देशैभरका शिवभक्तहरूको नजर अहिले त्रिवेणीधामतर्फ मोडिएको छ। नवलपरासीको प्रसिद्ध धार्मिक स्थल त्रिवेणीधाम, जहाँ काली, गण्डकी र सोनापुर नदीको संगम स्थल रहेको छ — हिन्दू धर्मावलम्बीहरूका लागि एक महत्वपूर्ण तीर्थस्थल।
हरेक वर्ष साउनको सोमबारहरूमा यहाँ विशेष चहलपहल देखिन्छ। बोलबम भन्दै काँवर बोकेर भक्तजनहरू त्रिवेणीको पवित्र जल लिएर शिवलाय मन्दिरमा जल अर्पण गर्न आउँछन्।
त्रिवेणीमा रहेको पुरातात्त्विक शिवलाय मन्दिर — जुन ऐतिहासिक एवं धार्मिक दृष्टिले अत्यन्त महत्वपूर्ण मानिन्छ — अहिले भक्तजनहरूको भीडले भरिएको देखिन्छ।
शिवलाय मन्दिर मात्र होइन, त्रिवेणी क्षेत्रको अर्काे आकर्षण भनेको सिसमहल हो। पवित्र जल लिई शिवलायमा अर्पण गरेपछि श्रद्धालुहरू यही सिसमहल पुग्छन्, जहाँको वातावरणले शान्ति, आस्था र संस्कृतिको सुगन्ध फैलाइरहेको हुन्छ।
बोलबमको नारा, काँवर बोकेका भक्तजन, धार्मिक भजन र श्रद्धाको भाव — यी सबै त्रिवेणीधामको साउन यात्रा विशेष बनाउँछन्।
कतिपय भक्तजनहरू सयौं किलोमिटरको दूरी पैदल तय गर्दै यहाँ आइपुग्छन्, जल चढाउने मात्र होइन, आत्मिक शुद्धिको अनुभूति गर्न पनि।
शिवको नाममा गरिएको यो कठिन यात्रा श्रद्धा, आस्था र समर्पणको अनुपम उदाहरण हो।
साउन महिनामा त्रिवेणीधाम पुग्नु — अब एउटा धार्मिक गन्तव्य मात्र नभई, आत्मिक शान्तिको यात्रा पनि बनेको छ।
