२०८३, श्रावण १३ गते
.png){kind=small}
लुम्बिनी चिन्तन
भैरहवा, साउन ३० । चेम्बर अफ कमर्स रूपन्देहीले आफ्नो वार्षिक कार्ययोजनाअनुसार स्तन क्यान्सर र प्रजनन स्वास्थ्य सम्बन्धी अभिमुखीकरण कार्यक्रम चेम्बरको सभा हलमा सम्पन्न गरेको छ ।
कार्यक्रममा चेम्बर अफ कमर्सका अध्यक्ष दपर्ण श्रेष्ठले महिलाहरूले स्वास्थ्यका कुरामा अझ सजग हुनु आवश्यक र उक्त कार्यक्रमले स्तन क्यान्सरबारे थुप्रै भ्रम हटाउनुका साथै सचेत बनाएको भन्दै यसले भविष्यमा स्वास्थ्य परीक्षण नियमित गरिराख्न पनि यस प्रशिक्षणले प्रेरणा दिएको उल्लेख गर्नुभयो ।
प्रशिक्षक तथा सांसद डा. तोसिमा कार्कीले स्तन क्यान्सर महिलाहरूमा देखिने सबैभन्दा सामान्य क्यान्सरमध्ये एक रहेको बताउनु भयो । स्तन क्यानसरका मुख्य लक्षणहरूहरुका बारेमा जानकारीदिदै कार्कीले स्तनमा गिर्खा वा गाँठो देखिनु, स्तनको आकार वा रंगमा परिवर्तन, निप्पलबाट असामान्य स्राव आउनु, वा छालामा खिचाव वा घाउ हुनु पर्छ । महिलाहरूले २० वर्ष नपुग्दै नै नियमित स्व–परीक्षण गर्नुपर्ने र ४० वर्षपछि नियमित म्यामोग्राम गराउनु उचित हुने पनि सांसद कार्कीले बताउनु भयो ।
यसैगरी अर्की प्रशिक्षक जिता बरालले यो क्यान्सर स्तनको कोषहरूमा सुरु हुन्छ र समयमै जाँच तथा उपचार नगरेमा शरीरको अन्य भागमा फैलिन सक्छ। प्रारम्भिक चरणमा पत्ता लगाउन सकिएमा यसबाट पूर्णरूपमा निको हुने सम्भावना उच्च हुन्छ। बरालले जानकारी दिनुभयो ।
चेम्बर अफ कमर्स रूपन्देहीले यस्ता कार्यक्रममार्फत स्वास्थ्य सम्बन्धी जनचेतना फैलाउने कार्यलाई अझ प्रभावकारी बनाउँदै लैजाने प्रतिबद्धता व्यक्त गरेको छ।
कार्यक्रममा निवर्तमान अध्यक्ष, पूर्वअध्यक्ष, सम्पूर्ण सल्लाहकार, कार्यसमिति पदाधिकारी, साधारण सदस्य, आस्था महिला उद्यमी, संघ परिवार लुम्बिनी शाखा, परिवार होटल संगठनका अध्यक्ष तथा सदस्यहरू, साथै अमुवा, धकधई र मर्चवार क्षेत्रका समन्वयहरूको उपस्थिति रहेको थियो । उक्त कार्यक्रमको संयोजन बिन्दु न्यौपानेले गर्नुभएको हो ।
