२०८३, श्रावण १३ गते
.png){kind=small}
लुम्बिनी चिन्तन
दाङ । तुलसीपुर उपमहानगरपालिका ६ स्याउली बजारमा रोकिराखेको भारतीय आरजे ०१ सीसी ०८८५ नम्बरको गाडीमा तीन बच्चाको शव भेटिएको प्रहरीले पुष्टि गरेको छ। दाङको तुलसीपुरमा कारमा भेटिएका तीन बालबालिकाको शव पहिचान गर्न वरपरका अभिभावकलाई डाकिएको छ। भारतीय नम्बर प्लेटको कारभित्र भेटिएको शव सडेको अवस्थामा रहेपछि पहिचान गर्न अभिभावकलाई डाकिएको इलाका प्रहरी कार्यालय तुलसीपुरका निरीक्षक झलकप्रसाद शर्माले बताए।
उनका अनुसार तीन महिनाअघिदेखि तुलसीपुर उपमहानगरपालिका ६ स्थित स्याउली बजारको खाली जग्गामा रोकेर राखिएको कारमा शव भेटिएको थियो।
शव नेपाली बालबालिकाको हुन सक्ने प्रहरीको अनुमान छ। एकजना ९/१० वर्षका र दुईजना ७/८ वर्षका जस्ता देखिन्छन्। तर उनीहरुको लैंगिक पहिचान भने खुल्न सकेको छैन।
प्रहरीले बालबालिका हराए भनेर अहिलेसम्म कसैले उजुरी नगरेकाले घटना गम्भीर र रहस्यमय हुन सक्ने अनुमान गरेको छ।
शर्माले भने, 'शव पहिचानका लागि केही अभिभावकलाई डाकिएको छ। त्यसपछि बच्चाको कसका हुन् थाहा हुन सक्छ।'
घटना अनुसन्धानका क्रममा शंकास्पद एक जनालाई पक्राउ गरेको शर्माले जानकारी दिए। गाडी कसको हो भनेर पत्ता लगाउन सकिएको छैन। प्रहरीका अनुसार यसबारे विस्तृत अनुसन्धान भइरहेको छ। प्रहरीले घटनाबारे अनुसन्धान गर्न कुकुरको पनि सहायता लिने तयारी गरेको छ। यसका लागि नेपालगन्जबाट प्रहरीको तालिम प्राप्त कुकुर झिकाउन लागिएको प्रहरीले जनाएको छ।
भारतीय नम्बर प्लेट आरजे ०१ सीसी ०८८५ को कार विगत तीन महिनादेखि त्यहाँ रोकिएको थियो। बालबालिकाको शव भेटिएपछि शनिबार साँझ प्रमुख जिल्ला अधिकारी दीर्घनारायण पौडेलसहित सुरक्षा अधिकारीहरुको टोली घटनास्थल पुगेको थियो।
प्रहरी अधिकारीका अनुसार शनिबार साँझ एउटा बस पार्किङका लागि त्यो कारनजिकै जाँदा चालक र सहचालकलाई निकै गन्ध आएको थियो। त्यसपछि वरिपरि हेर्दा केही नदेखिएको र बत्ती बालेर हेर्दा कारमा शव भेटिएको थियो।
शव सडेगलेको जस्तो देखिएकाले पहिचान गर्न कठिन भइरहेको प्रहरीले जनाएको छ। ‘कारनजिकै गन्ध आएपछि बसका स्टाफले के को गन्ध हो? भनी यताउता हेरेछन्,’ इलाका प्रहरी कार्यालय तुलसीपुरका प्रहरी नायब उपरीक्षक शिवबहादुर सिंहले भने, ‘बत्ती बोलर हेर्दा शव देखेपछि उनीहरूले प्रहरीलाई खबर गरेका हुन्।
